RASMIY MUNOSABAT (Ko‘p kvartirali uylarni boshqaruvchi tashkilotga biriktirish masalasi yuzasidan)
2026-10-28 16:15:00 / Rasmiy munosabat
Ijtimoiy tarmoqlarda Toshkent shahri, Mirzo Ulug‘bek tumani, TTZ-4 mavzesi, «Azamat» mahallasidagi 1, 2, 12, 13 va 14-sonli ko‘p kvartirali uylarni boshqa boshqaruvchi tashkilotga o‘tkazish hamda mulkdorlarning shaxsiy hisobvaraqlarini yangi tashkilotga biriktirish masalasi yuzasidan murojaatlar bildirilgan.
O‘zbekiston Respublikasining «Ko‘p kvartirali uylarni boshqarish to‘g‘risida»gi Qonuni va Vazirlar Mahkamasining 2024-yil 18-dekabrdagi 853-son qaroriga muvofiq, ko‘p kvartirali uyni boshqaruvchi tashkilotga biriktirish mulkdorlarning tegishli qarori va zarur hujjatlar asosida belgilangan tartibda amalga oshiriladi.
Mazkur holat yuzasidan o‘rganish natijasida «KROKUS PRO KOMMUNAL» MCHJning boshqaruv organlari elektron reyestrida ro‘yxatdan o‘tmaganligi, «SILK ROAD UNION» MCHJ tomonidan esa ko‘rsatilgan uylarni o‘z boshqaruviga biriktirish bo‘yicha elektron tizim orqali tegishli ariza taqdim etilmaganligi aniqlangan.
Shu sababli, uylarni yangi boshqaruvchi tashkilotga biriktirish masalasi «KROKUS PRO KOMMUNAL» MCHJ elektron reyestrda ro‘yxatdan o‘tganidan so‘ng yoki mazkur ko‘p kvartirali uylarni biriktirish bo‘yicha «SILK ROAD UNION» MCHJ tomonidan belgilangan tartibda ariza va zarur hujjatlar taqdim etilganidan so‘ng qonunchilik talablari asosida ko‘rib chiqiladi.
Shuningdek, «Mening uyim» axborot tizimidagi ma’lumotlar va shaxsiy hisobvaraqlarni yangi boshqaruvchi tashkilotga biriktirish tegishli hujjatlar asosida amalga oshiriladi. Topshirish-qabul qilish bilan bog‘liq nizolar esa qonunchilikda belgilangan tartibda hal etiladi.
Vazirlik ko‘p kvartirali uylarni boshqaruvchi tashkilotlarga biriktirish jarayonida qonuniylikni ta’minlash hamda mulkdorlarning huquq va qonuniy manfaatlariga rioya etilishiga ko‘maklashish bo‘yicha belgilangan vakolatlari doirasida ish olib boradi.
Qurilish va uy-joy kommunal xo‘jaligi vazirligi axborot xizmati