Bugun, 16-oktabr kuni, poytaxtdagi Milliy madaniy markazlar pavilonida “Tatar qizi – 2026” xalqaro ko‘rik-tanlovi g‘olibi, Botir Zokirov nomidagi Milliy estrada san’ati instituti talabasi Amina Mahmudovaga Turkmaniston Prezidenti Serdar Berdimuhamedov nomidan taqdim etilgan tanlov bosh sovrini “Zeekr” avtomobilini topshirish marosimi bo‘lib o‘tdi.

O‘zbek, tatar va turkman xalqlari o‘rtasidagi do‘stlik, hamjihatlik va madaniy hamkorlikni mustahkamlashga qaratilgan tadbirda milliy qadriyatlarni asrab-avaylash, madaniy merosni keng targ‘ib etish hamda iqtidorli yoshlarni qo‘llab-quvvatlash masalalariga alohida e’tibor qaratildi.

Marosimda madaniyat vaziri Ozodbek Nazarbekov, Millatlararo munosabatlar va xorijdagi vatandoshlar masalalari bo‘yicha qo‘mita raisi, Turkmanistonning O‘zbekistondagi Favqulodda va muxtor elchisi hamda Oliy Majlis Qonunchilik palatasining Xalqaro ishlar, mudofaa va xavfsizlik masalalari qo‘mitasi raisi ishtirok etib, g‘olibni tabrikladi.

Tadbir doirasida ishtirokchilar Milliy madaniy markazlar paviloni bilan tanishib, turli xalqlarning urf-odatlari, an’analari va madaniy merosiga oid ekspozitsiyalarni ko‘zdan kechirdi. Milliy liboslardagi yoshlar ishtiroki, shuningdek, o‘zbek, tatar va turkman xalqlari o‘rtasidagi do‘stlik hamda “Tatar qizi” xalqaro ko‘rik-tanlovi jarayonlarini aks ettiruvchi videolavhalar tadbirga alohida fayz bag‘ishladi.

Marosimning tantanali qismida tanlov g‘olibi, Botir Zokirov nomidagi Milliy estrada san’ati instituti talabasi Amina Mahmudovaga bosh sovrin — “Zeekr” avtomobili topshirildi. Shuningdek, madaniyat vaziri Ozodbek Nazarbekov tomonidan u “Madaniyat va san’at fidokori” ko‘krak nishoni bilan taqdirlandi.

Amina Mahmudova o‘z navbatida bildirilgan e’tibor va ishonch uchun minnatdorlik bildirib, ushbu g‘alaba uning zimmasiga katta mas’uliyat yuklashini ta’kidladi. Kelgusida ham o‘z bilimi, iqtidori va mehnati bilan xalqqa munosib xizmat qilishga intilishini qayd etdi.

Mazkur tadbir yoshlarning iste’dodi va salohiyatini yuzaga chiqarish, milliy madaniyat va an’analarni asrab-avaylash, shuningdek, O‘zbekistonda istiqomat qilayotgan turli millat va elatlar o‘rtasidagi do‘stlik, o‘zaro hurmat va madaniy hamkorlikni yanada mustahkamlashda muhim ahamiyat kasb etdi.

Ma'lumot o‘rnida, Turkmanistonda bo‘lib o‘tgan “Tatar qizi— 2026” xalqaro tanlov finalida Rossiya, Qirg‘iziston, Turkiya, Turkmaniston va O‘zbekiston vakillari bo‘lgan 12 nafar qiz ishtirok etdi. Ishtirokchilar ijodiy shartlarda o‘zaro bellashib, til bilimi, milliy an’analar va madaniyat borasidagi bilimlarini namoyish etdilar. Shuningdek, o‘zlarining individual iste’dodlari va san’atkorlik mahoratini ochib berdilar. Amina Mahmudova O‘zbekistonni munosib tarzda namoyon etib, tanlov yakuniga ko‘ra g‘olib deb topildi. Bosh mukofot sifatida unga Turkmaniston Prezidenti Serdar Berdimuhamedov nomidan ZEEKR rusumli avtomobil taqdim etildi.