Surxondaryoda ichki ishlar organlari xodimlari ishtirokida xizmat intizomi, qonuniylik va kiberxavfsizlik masalalariga bagʻishlangan oʻquv-amaliy seminar oʻtkazildi
2026-11-03 09:00:00 / Yangiliklar
Oʻzbekiston Respublikasi Ichki ishlar vaziri oʻrinbosarining tegishli farmoyishiga asosan tashkil etilgan vazirlik ishchi guruhi tomonidan Surxondaryo viloyati Ichki ishlar boshqarmasining barcha sohaviy xizmatlari, shahar va tuman ichki ishlar organlari hamda Qoʻriqlash xizmati shaxsiy tarkibi ishtirokida oʻquv-amaliy seminar oʻtkazildi.
Seminarda Oʻzbekiston Respublikasi IIV Shaxsiy xavfsizlik bosh boshqarmasi, Maʼnaviy-maʼrifiy ishlar va kadrlar bilan taʼminlash hamda Kiberxavfsizlik departamentlari, shuningdek, IIV Axborot xizmati masʼul xodimlari ishtirok etib, ichki ishlar organlari xodimlarining kundalik xizmat faoliyatida alohida eʼtibor qaratilishi lozim boʻlgan muhim masalalar yuzasidan atroflicha tushuntirishlar berdi.
Xususan, seminar davomida ichki ishlar organlari xodimlarining xizmat va ijro intizomiga qatʼiy rioya etishi, rahbar va xodimlarning xizmat vazifalariga masʼuliyat bilan yondashishi, qonuniylik hamda xizmat etikasi talablariga amal qilishi, shuningdek, fuqarolar bilan muloqot jarayonida xushmuomalalik va kasbiy madaniyatni namoyon etishi zarurligi alohida taʼkidlandi.
Bugungi raqamli texnologiyalar jadal rivojlanayotgan sharoitda kiberxavfsizlik masalalariga ham alohida eʼtibor qaratildi.
Jumladan, xizmat faoliyatida axborot-kommunikatsiya texnologiyalaridan foydalanish, xizmatga oid maʼlumotlarning maxfiyligini saqlash, shaxsiy maʼlumotlar va axborot resurslarini himoya qilish, turli kiberxavflar hamda internet orqali sodir etiladigan firibgarlik holatlaridan ogoh boʻlish yuzasidan tushuntirishlar berildi.
Seminar davomida nazariy maʼlumotlar bilan bir qatorda, kundalik xizmat faoliyatida uchrashi mumkin boʻlgan turli vaziyatlar misolida amaliy tushuntirishlar ham berildi. Yoʻl qoʻyilgan xato va kamchiliklar, ularning kelib chiqish sabablari hamda bunday holatlarning takrorlanishiga yoʻl qoʻymaslik choralari atroflicha muhokama qilindi.
Tadbirning savol-javob qismida ishtirokchilarni qiziqtirgan savollarga mutaxassislar tomonidan batafsil javoblar berilib, xizmat faoliyatida uchrayotgan muammolar va ularning yechimlari yuzasidan amaliy tavsiyalar bildirildi.
Taʼkidlash joizki, bunday oʻquv-amaliy seminarlar ichki ishlar organlari xodimlarining kasbiy bilim va koʻnikmalarini muntazam oshirib borish, xizmat intizomi va qonuniylikni mustahkamlash, zamonaviy tahdid va xavf-xatarlarga nisbatan ogohlikni kuchaytirish hamda tizim faoliyatida yagona yondashuvni shakllantirishda muhim ahamiyat kasb etadi.
Surxondaryo viloyati IIB Axborot xizmati