Özbеkiston Rеspublikаsi Içki işlаr vаzirligi

Ichki ishlar vazirligida jinoyatchilikka qarshi kurashish samaradorligini oshirish hamda joylarda kriminogen vaziyatni barqarorlashtirish masalalariga bagʻishlangan yigʻilish boʻlib oʻtdi.

Tadbirda Ichki ishlar vaziri general-leytenant Aziz Tashpulatov, Prezident Administratsiyasining masʼul rahbarlari, vazir oʻrinbosarlari, sohaviy xizmatlar va hududiy ichki ishlar organlari rahbarlari, shuningdek, shaxsiy tarkib ishtirok etdi.

Yigʻilish kun tartibiga koʻra tashkiliy masala koʻrib chiqildi.

Oʻzbekiston Respublikasi Prezidentining qaroriga muvofiq, polkovnik Mirmansur Mirshaxidovich Mirxamidov Oʻzbekiston Respublikasi ichki ishlar vazirining birinchi oʻrinbosari — Tezkor-qidiruv departamenti boshligʻi lavozimiga tayinlangani maʼlum qilindi.

Tadbir davomida, Davlat rahbari tomonidan belgilangan vazifalardan kelib chiqib, mamlakatimizda jinoyatchilik va uning uyushgan turlariga qarshi kurashish, joylardagi kriminogen vaziyatni chuqur tahlil qilish, jinoyatlar sodir etilishiga imkon berayotgan shart-sharoit va omillarni barvaqt aniqlash, har bir mahallada xavfsiz muhitni shakllantirish hamda tezkor-profilaktik chora-tadbirlar samaradorligini oshirishga alohida eʼtibor qaratildi.

Shu bilan birga, jinoyatchilikka qarshi kurashishda rahbar va xodimlarning shaxsiy masʼuliyatini kuchaytirish, ijro intizomiga qatʼiy rioya etish hamda belgilangan chora-tadbirlarning oʻz vaqtida va sifatli bajarilishini taʼminlash yuzasidan tegishli koʻrsatmalar berildi.

Yigʻilish yakunida bildirilgan taklif va mulohazalar inobatga olinib, jinoyatchilikka qarshi kurashish borasidagi ishlarni yanada takomillashtirish, belgilangan ustuvor vazifalar ijrosini tizimli tashkil etish hamda yangi tayinlangan rahbar zimmasiga yuklatilgan majburiyatlarni samarali amalga oshirish yuzasidan tegishli topshiriqlar berildi.