Namangan davlat universitetining Yuridik fakultetida yangi oʻquv yili munosabati bilan “Rahbar va yoshlar uchrashuvi” boʻlib oʻtdi
2026-09-08 09:00:00 / Yangiliklar
Bugun respublikamizning barcha hududlarida 2026/2027-oʻquv yilining boshlanishiga bagʻishlangan tantanali tadbirlar oʻtkazildi.
Shu munosabat bilan Namangan davlat universitetining Jahon tillari hamda Yuridik fakultetlari oʻquv binosida “Yagona Vatan, yagona xalq boʻlib, yangi hayot va kelajak yaratamiz!” shiori ostida “Rahbar va yoshlar uchrashuvi” tashkil etildi.
Unda Namangan viloyati IIB boshligʻi, Oʻzbekiston Respublikasi Prezidentining Namangan viloyatidagi Xalq qabulxonasi mudirining oʻrinbosari, universitetning birinchi prorektori, fakultet dekani, professor-oʻqituvchilar, talaba-yoshlar hamda ularning ota-onalari ishtirok etdi.
Uchrashuvda ishtirokchilar Oʻzbekiston Respublikasi davlat mustaqilligining 35-yilligi bilan samimiy tabriklanib, istiqlol yillarida oliy taʼlim, ilm-fan va innovatsiyalarni rivojlantirish, yoshlarning sifatli bilim olishi va oʻz salohiyatini roʻyobga chiqarishi uchun yaratilayotgan keng imkoniyatlar haqida fikr bildirildi.
Shuningdek, zamonaviy bilim va kasbiy koʻnikmalarga ega, mustaqil fikrlaydigan, vatanparvar va tashabbuskor yoshlarni tarbiyalash oliy taʼlim muassasalarining ustuvor vazifalaridan ekani koʻrsatib oʻtildi.
Namangan viloyati IIB boshligʻi va Xalq qabulxonasi mudirining oʻrinbosari talaba-yoshlarni yangi oʻquv yili bilan samimiy qutlab, ularga bilim olish yoʻlida qatʼiyatli boʻlish, yaratilayotgan imkoniyatlardan unumli foydalanish, oʻz oldiga yuksak maqsadlar qoʻyib, kelajakda Vatan ravnaqiga munosib hissa qoʻshadigan yetuk mutaxassis boʻlib voyaga yetishlarini tiladi.
Tadbir davomida oliy taʼlim muassasalariga kirish imtihonlarida yuqori natijalarga erishib, Namangan davlat universitetiga talabalikka tavsiya etilgan bir guruh iqtidorli yoshlar alohida eʼtirof etilib, ularga kitoblar sovgʻa qilindi.
Namangan viloyati IIB Axborot xizmati