“Korrupsiyaga qarshi kurashish“ oyligi doirasida Navoiy viloyati IIBda kengaytirilgan yigʻilish oʻtkazildi
2026-06-27 19:40:00 / Yangiliklar
Korrupsiya jamiyatda adolat, tenglik, sogʻlom raqobat va halollik ustun boʻlishiga toʻsqinlik qiladigan, davlat va jamiyatning rivojiga salbiy taʼsir koʻrsatuvchi illatlardan biri. Joriy yilning iyun Ichki ishlar vazirligi tizimida “Korrupsiya qarshi kurashish“ oyligi deb eʼlon qilinib, mazkur illatga qarshi ayovsiz kurash olib borish borasida bir qator samarali ishlar amalga oshirilmoqda.Shu munosabat bilan viloyat IIB boshligʻining oʻrinbosari, Maʼnaviy-maʼrifiy ishlar va kadrlar bilan taʼminlash xizmati boshligʻi, podpolkovnik Shokirjon Sadikov huzurida kengaytirilgan videoselektor yigʻilishi tashkil etildi. Tanqidiy-tahliliy ruhda oʻtgan yigʻilishda boshqarmaning sohaviy xizmatlari hamda tarkibiy tuzilmalar boshliqlarining maʼnaviy-maʼrifiy ishlar boʻyicha oʻrinbosarlari, kadrlar bilan taʼminlash guruhi inspektorlari hamda Tibbiyot boʻlimi mutaxassis xodimlari ishtirok etdi.
Yigʻilish davomida korrupsiyaviy xavf-xatarlarni barvaqt aniqlash va bartaraf etish, fuqarolar bilan muloqot jarayonlarida ochiqlik hamda xolislik prinsiplariga amal qilish, shuningdek, xizmat vakolatlarini suiisteʼmol qilish bilan bogʻliq holatlarning oldini olish borasidagi ishlar tahlil qilinib, respublika miqyosida IIO xodimlari tomonidan sodir etilgan salbiy holatlar yigʻilganlar diqqatiga yetkazildi.
Yigʻilish yakunida korrupsiyaning har qanday koʻrinishiga nisbatan murosasiz munosabatni yanada kuchaytirish hamda bu boradagi profilaktik chora-tadbirlar samaradorligini oshirish zarurligi alohida taʼkidlandi va bu borada masʼullarga tegishli koʻrsatma, topshiriqlar berildi.