Innovatsion yechim: O‘zbekistonda smart issiqxonalarda zamonaviy ko‘chatlar yetishtirilmoqda
2026-09-15 17:00:00 / Yangiliklar
Albatta, ushbu maqsadlarni amalga oshirishda o‘rmon xo‘jaligi sohasiga ilg‘or innovatsion texnologiyalarni keng jalb qilish, zamonaviy ko‘chatchilikni barpo etish samarali yo‘llardan hisoblanadi. Xususan, Janubiy Koreya Respublikasining KOICA kompaniyasi bilan hamkorlikda Toshkent ko‘chatchilikka ixtisoslashgan davlat o‘rmon xo‘jaligi hududida zamonaviy smart issiqxona tashkil etilishi ham muhim qadamdir.
7 gektar maydonda barpo etilgan ushbu 14 ta smart issiqxonada yirik hajmli va yopiq ildizli ko‘chatlar maxsus konteynerlarda yetishtirilmoqda. Loyiha bosh muhandisi, Janubiy Koreyalik mutaxassis doktor Li Dok Soning ta'kidlashicha, bir necha yildan buyon O‘zbekistonda ko‘chat yetishtirish, ularni tog‘li hududlarga olib borib ekish jarayonlari kuzatib kelinmoqda. So‘nggi o‘n yil davomida O‘zbekiston madaniyati, tabiiy sharoiti va atrof-muhit xususiyatlari o‘rganildi.
Shuningdek, O‘zbekiston sharoitida eng kam xarajat bilan sifatli ko‘chat yetishtirish va tog‘li hududlarda ekilgan daraxtlarning yaxshi unib ketishini ta’minlash yo‘llari tadqiq qilindi. Aslida, ushbu tizim dastlab Koreyada rejalashtirilib, sinov tariqasida ishlab chiqildi. Shundan so‘ng O‘zbekistonda joriy qilindi.
"Ayni damda ham O‘zbekiston sharoitiga mos ko‘chat yetishtirish borasida ko‘plab ishlar amalga oshirilmoqda. Ishonamizki, loyiha yakunida, 2028-yilda ushbu tizim O‘zbekiston sharoitiga mos va amalda samarali texnologiyaga aylanadi, — dedi mutaxassis. — Biz O‘zbekiston tabiiy sharoitiga mos, kamxarajat va ko‘chatlarning yaxshi o‘sib, yashab qolishini ta’minlaydigan usullarni ham alohida ishlab chiqmoqdamiz".
Mutaxassislarga ko‘ra, ushbu smart issiqxonalar bir qancha afzalliklarga ega. Birinchidan, bu yerda ilg‘or texnologik uskunalar yordamida suv sezilarli darajada tejaladi. Nihollar yerda emas, maxsus tuvaklarda yetishtirilishi hisobiga o‘rtacha 1 yilda ekish uchun tayyor bo‘ladi. Avtomatik boshqaruv hisobiga qo‘l mehnati kamayadi. Barcha jarayonlar maxsus dastur ko‘magida bajariladi va bu ko‘chatlarning sifatli rivojlanishini ta'minlaydi. Asosiysi, bunday sharoitlarda maxsus konteynerlarda yetishtirilgan ko‘chatlarni tog‘li hududlarga yetkazish, ekish ancha oson va ayni jihatlar ham xarajatlar kamayishiga xizmat qiladi.
Mazkur smart issiqxonalar oktabr oyida to‘liq foydalanishga topshiriladi.