Mintaqaning IT-potentsialini hamkorlikda namoyish etish maqsadida “Silkroad Innovation Hub” tashkiloti tashabbus bildirdi. Shuningdek, “Silkroad Innovation Hub” tashkiloti o‘zining pavilyonini taqdim etdi va unda Markaziy Yevroosiyodan tashrif buyurgan 14 ta startaplar, jumladan, IT-Park rezidentlari ham ishtirok etdilar.

Mazkur tadbirning asosiy qismi “Expo” boʻlib, unda Oʻzbekiston stendiga qiziqish bildirgan IT sohasi vakillari mamlakatda BPO va IT-autsorsingni rivojlantirish boʻyicha oʻzlarini qiziqtirgan savollarga javob oldilar, shuningdek, Oʻzbekistonda startap va venchur ekotizimlari rivojlanishi haqida maʼlumot berildi hamda “IMAN”, “Mohirdev”, “Workly” va “MyID” kabi IT-Park rezidentlarining stendlari namoyish etildi:

“IMAN” – mijozlarga “P2P” investorlari tomonidan moliyalashtirilgan chakana sotuvchilardan xohlagan narsani sotib olish imkonini beruvchi shariatga mos keladigan “PoS” yechimini taqdim etdi;

“Mohirdev” – barcha yoshdagilar uchun dasturlashni o‘rganish uchun ekotizim yaratmoqda. U 30 dan ortiq mahoratga asoslangan dasturlash kurslariga ega bozorni taklif qildi, shuningdek, o‘quv markazlari va universitetlarga o‘zlarining dasturlash kurslarini ochishga yordam berish uchun “CRM” va “LMS” yechimlarini yaratdi;

“Workly” – bu kichik va o‘rta biznes uchun bulutli texnologiyalarga asoslangan ish vaqtini hisobga olish yechimi. Tizim xodimlarga ta’til so‘rash, jadval yangilanishlarini olish va daromadlarni kuzatish imkonini beradi;

“MyID” – raqamli texnologiyalar sohasida istiqbolli startap va “Pastoral” – chorvachilik uchun dunyodagi birinchi sun’iy intellekt (AI) asoslangan platforma bo‘lib, Telegram orqali hayvonlar to‘g‘risida intellektual ma’lumotlarni taklif qiladi.

Bo‘lib o‘tgan tadbir davomida IT-Park rezidentlari AQSh innovatsion ekotizimining yetakchi vakillari bilan aloqalar o‘rnatishdi.

Bu O‘zbekiston texnologiya sektoridagi o‘sish va innovatsiyalar salohiyatini, shuningdek, mahalliy va xalqaro investorlarning mamlakat startap ekotizimini qo‘llab-quvvatlashga qiziqishi ortib borayotganini ko‘rsatadi.

Shu bilan birga, “Raqamli asrda Buyuk Ipak yo‘lining tiklanishi” panel sessiyasi O‘zbekiston, Ozarbayjon, Qirg‘iziston va Qozog‘iston mintaqalar rahbarlari ishtirokida tashkil etildi. Muhokama koʻpchilikning eʼtiborini tortdi va asosiy ekspertlar sifatida: IT-Park Ijrochi direktori – Abdulaxad Kuchkarov, Qozogʻiston Respublikasi Raqamli rivojlanish, innovatsiyalar va aerokosmik sanoat vaziri oʻrinbosari – Asqar Jambakin, Innovatsiyalar va raqamli rivojlanish agentligi (Ozarbayjon) raisi vazifasini bajaruvchi – Inara Valieva, shuningdek, hudud to‘g‘risida toʻliq taqdimot “Silkroad Innovation Hub” asoschisi va bosh direktori – Asset Abdullaev ishtirok etdi.

IT-Park Ijrochi direktori “O‘zbekiston BPO va IT-autsorsing uchun yangi xabi” mavzusida taqdimot qildi. Taqdimot davomida yangi strategik yondashuv – “Zero Risk” dasturi haqida ma’lumot berildi, bu esa mamlakatimiz hududida xorijiy tadbirkorlikni ro‘yxatdan o‘tkazish va yuritishni sezilarli darajada osonlashtiradi hamda mamlakatning mehnat salohiyatini oshirishga yordam beradi.

IT-Park vakili yosh IT-iqtidorlar orasida ingliz tilini bilish darajasi balandligini, soliq imtiyozlari va kelajak rejalarini qayd etib, O‘zbekistonning kelgusidagi asosiy maqsadi – O‘zbekistonning IT-eksport hajmini 5 milliard AQSh dollariga yetkazish, shundan 3 milliard AQSh dollari AQSh bozoridan kelishini ta’kidladi.

Ma’lumot uchun: “TechCrunch Disrupt” – startap hamjamiyatining yetakchi xalqaro tadbirlaridan biri boʻlib, har yili butun dunyo boʻylab tadbirkorlar, investorlar va jurnalistlarni texnologiya olamidagi soʻnggi tendentsiyalar va innovatsiyalarni muhokama qilish uchun birlashtiradi.